ನೀ ಬರುವೆ

ವರ್ಷ ಋತುವಿನ ಪರ್ವ

ಸುತ್ತ ಮಂಜಿನ ಮುಸುಕು

ಚಂದ್ರನಾ ಮೊಗ ಮುಚ್ಚಿರಲು

ಕಾದಿರುವೆ ನೀ ಬರುವೆಯೆಂದು

ಸಂಜೆ ಮಂಜಿನ ತಂಪು

ನಾಸಿಕದಿ ಅಲೆಯಂತೆ

ಉಸಿರಿನಲಿ ಬೆರೆತಿರಲು

ಕಾದಿರುವೆ ನೀ ಬರುವೆಯೆಂದು

ಸುಮಗಂಧ ಉಸಿರಿನಲಿ

ಹಸಿರ ಕಸಿ ಕಂಗಳಲಿ

ಬೆರೆಸಿ ಪ್ರೀತಿಯ ಸಿಹಿಯ

ಕಾದಿರುವೆ ನೀ ಬರುವೆಯೆಂದು

ಮೆಲ್ಲ ಬೀಸುವ ಗಾಳಿ

ಕೊಂಚವೇ ಸುರಿವ ಮಳೆ

ಹಸಿರೆಲೆಯು ತಲೆದೂಗಿರಲು

ಕಾದಿರುವೆ ನೀ ಬರುವೆಯೆಂದು

ಸಂಜೆಯೆದ್ದ ತಾರೆಗಳೂ

ನಿದ್ದೆ ಮಂಪರಿನಲ್ಲಿ

ಒಲವಿನಾ ಕಣ್ಬಿಟ್ಟು ನಾ

ಕಾದಿರುವೆ ನೀ ಬರುವೆಯೆಂದು

ನಿಶೆ ಹರಿದು ಬೆಳಗಾಯ್ತು

ಹರಡಿದ ತಾರೆಗಳ್ ಸರಿದು

ರವಿಯೂ ಒಬ್ಬಂಟಿಯಾಗಲು

ಕಾದಿರುವೆ ನೀ ಬರುವೆಯೆಂದು

ನಿತ್ಯ ಅರಳುವ ಕುಸುಮ

ಸಂಜೆಯಲಿ ಬಾಡುತಿದೆ

ಕಾವ್ಯ ಚಿರನೂತನವೆನುತ

ಕಾದಿರುವೆ ನೀ ಬರುವೆಯೆಂದು