ಭಾವನಾ

ನಾ ನಿನ್ನ ವರಿಸಿದೆ
ನೀ ನನ್ನ ಆವರಿಸಿದೆ

ನಾ ಏನೆಲ್ಲಾ ಅರಸಿ
ಬಂದೆನೋ?
ಅರಸಿ ಅರಸಿ ನೀ
ಏನೆಲ್ಲಾ ತಂದೆಯೋ?

ನೀ ಅರಸಿಯ
ತೆರದಿ ಕಂಡೆ
ಹೆಸರಿಗೆ ಲೇಸ
ತಂದೆ

ಅರಸಿಯ ಅರಸೆ
ಮತ್ತೆ ಮಾತಿಲ್ಲ
ಮುತ್ತನರಸಿ ಬರೆ
ಮತ್ತು ಮತ್ತಿಲ್ಲ

ಒಪ್ಪುವ ಅಂದ
ಅದು ಬಹಿರಂಗ
ಬೇಕೇ??
ಒಪ್ಪಿದ ಅಂದ
ಒಪ್ಪಂದ
ಅದು ಅಂತರಂಗ
ಸಾಕೇ??

ಅರ್ಧಸತ್ಯ

ನಿನ್ನೆ ನಿನ್ನ
ಕಂಬನಿಯ ಹನಿ
ನನ್ನ ಬೆನ್ನಿಗೆ ತಾಗಿ
ಮನ ತೊಯ್ದುಹೋಯ್ತು
ಮಾತು ಮೂಕವಾಗಿ
ಮನಕೆ ಮೌನ
ಬುದ್ಧಿಗೂ ಮೆದುಳಿಗೂ
ಸಂಪರ್ಕವಿಲ್ಲ
ಗಾಡಿ ಓಡುತ್ತಿತ್ತು
ಹೃದಯ ನಿಶ್ಚಲವಾದ ಅನುಭವ
ಒಂದನ್ನೊಂದು ಹಿಂದಿಕ್ಕಿ
ಹೋಗುವ ತೆರದಿ ವಿಚಾರಗಳು
ಪಟಪಟನೆ ಹಾದುಹೋದವು
ನಿಜಸತ್ಯ ಅರ್ಥವಾಗಲಿಲ್ಲ
ಅರ್ಥ ಮನದ ಗರ್ಭದಲ್ಲೇ ಉಳಿಯಿತು
ಹೂತುಬಿಡುತ್ತೇನೆ ಆ ಕ್ಷಣದ ನೆನಹುಗಳನ್ನು
ಮತ್ತೆ ತಾಳಲಾರೆ ಆ ಅಂತರಾಳದ ಗಾಯವಾಗದ ನೋವುಗಳನ್ನು...

ನೆನಪಿನೋಕುಳಿ

ನಿನ್ನ ವದನವ
ಕಣ್ತುಂಬ ಮನದುಂಬಿ
ಈಕ್ಷಿಸುವಾಸೆಯಲಿ
ನಾನಿರಲು,
ನೀ ಕೈ ಎತ್ತಿ
ಗುದ್ದುವ ಪರಿಯ
ನೆನೆಯುತ್ತಿರುತ್ತೇನೆ

ಬೈಕಿನಲಿ ಜೊತೆಯಲಿ
ಪಯಣದ ಕಾಲದಲಿ
ಕಾಡ ದಾರಿಯಲಿ
ನೆಲ್ಲಿಮರ ನೇರಳೆಮರ
ಸಿಗಲೆಂದು ಮನದಿ
ಅಂದುಕೊಳ್ಳುತ್ತಿರುತ್ತೇನೆ

ಮುಸ್ಸಂಜೆಯಲಿ
ಪಕ್ಕ ನಿಂತು ನಗುವ
ಸೂಸುತ ನೀನಿರಲು
ಚಂದ್ರನ ಮತ್ತೆ ಮತ್ತೆ
ನೋಡುವಂತಾಗಲೆಂದು
ಆಸೆ ಪಡುತ್ತಿರುತ್ತೇನೆ

ನೀ ಸಿಹಿಯ ತುಂಬಿ
ಕಷಾಯ ಈಯಲು
ಮೇಲೆ ಮೂಡುವ
ಕೆನೆ ಪದರ
ನನ್ನ ತುಟಿಗಂಟಲೆಂದು
ಅಂದುಕೊಳ್ಳುತ್ತಿರುತ್ತೇನೆ

ಗುಂಪಿನಲಿ
ಹಿಂದಿನ ಸಾಲಿನಲಿ
ನಿಂತು ನಿನ್ನ
ಬಿಡುಗೂದಲ
ತುದಿಯ ಮೆಲ್ಲನೆ
ಎಳೆಯಲು
ಕಾಯುತ್ತಿರುತ್ತೇನೆ

ನಿಸರ್ಗದ
ಸೌಂದರ್ಯವ ನೀ
ಭಾವುಕಳಾಗಿ
ಸವಿಯುವ
ಆ ಪರಿಯ
ಮತ್ತೆ ಮತ್ತೆ ನೋಡಲು
ಕಾತರಿಸುತ್ತಿರುತ್ತೇನೆ

ಸಣ್ಣನೆ ಚಳಿಯಲ್ಲಿ
ನೀ ನನ್ನ ಎದೆಗೊರಗಿ
ಬಿಸಿ ಅಪ್ಪುಗೆಯ
ನೀಡಲು
ಮನ ಅರಳಿ
ಹೂವಾಗುವುದ
ಕಣ್ಮುಚ್ಚಿ
ಅನುಭವಿಸುತ್ತಿರುತ್ತೇನೆ

ಬೈಕಿನಲಿ ಜೊತೆ
ಅಂಟಿದಂತೆ
ಕುಳಿತಾಗ
ಪಯಣ
ನಿರಂತರವಾಗಿರಲೆಂದು
ಆಶಿಸುತ್ತಿರುತ್ತೇನೆ

ಕಂಗಳ ಬತ್ತಳಿಕೆಯೊಂದ
ರೆಪ್ಪೆಗಳನ್ನೊಮ್ಮೆ ಮುಚ್ಚಿ
ಆ ಕರಿಹುಬ್ಬ
ಬಾಗಿಸಿ ನೀ
ಬಿಡುವ ನೋಟದ ಬಾಣ
ಉರಕೆ ತಾಗಲೆಂದು
ಕಾಯುತ್ತಿರುತ್ತೇನೆ

ಮಧುರ ಮಧು
ತುಂಬಿದ ಪುಟ್ಟ
ಅಧರಗಳ
ಹೀರಿ ತೆಗೆದಷ್ಟೂ
ಮಧು ಅಕ್ಷಯವಾಗಲೆಂದು
ಮುಲುಗುತ್ತಿರುತ್ತೇನೆ

ಫೋನಿನಲಿ
ಅಲೆಗಳು
ನಾನಿತ್ತ ಮುತ್ತ
ನಿನ್ನತ್ತ ಸೇರಿಸುವಾಗ
ತುಟಿಯ ಕೆಂಬಣ್ಣ
ನಿನ್ನ ಕೆನ್ನೆಗೂ
ಬಂತೇನೋ ಎಂದು
ಭಾವಿಸುತ್ತಿರುತ್ತೇನೆ

ನನ್ನ ನಿನ್ನ
ಜೀವನ ಒಂದಾಗುವ
ಕಾಲ ಸನಿಹ
ಬರುತ್ತಿರುವಾಗ
ಯಾವತ್ತೂ
ಆ ನಿರ್ಮಲ
ಪ್ರೀತಿಗಾಗಿ
ಹಂಬಲಿಸುತ್ತಿರುತ್ತೇನೆ