ನನ್ನ ಪುಟ್ಟ ಕಂದ

ತಿಂಗಳಿಂದ ನವ ನವೀನ ಆನಂದವ ತರುತಿಹ
ತಾಯ ಮಡಿಲಿನಲ್ಲಿ ನನ್ನ ಪುಟ್ಟ ಕಂದ ಮಲಗಿಹ

ಮೃದುಲ ಕೆನ್ನೆ ಚಿಕ್ಕ ಮೂಗು ಕಣ್ಣ ನೋಟ ಪಿಳಿಪಿಳಿ
ಬೊಚ್ಚು ಬಾಯಿ ದುಂಡು ಮೊಗವು ಕಿವಿಯು ಸ್ವಲ್ಪ ಒಳಸುಳಿ

ಬಾಯಿ ತುಟಿಯ ಹೊರಳಿಸುತ್ತ ಏನೋ ಹೇಳಲೆಣಿಸುವ
ತನ್ನ ಮಾತು ತಿಳಿಯದವರು, ತಿರುಗಿ ಅತ್ತು ತಿಳಿಸುವ

ಪುಟ್ಟ ಕೈಯ ಬೆರಳುಗಳನು ಮಡಿಸಿ ಏನೋ ಎಣಿಸುವ
ಅಮ್ಮ ನೋಡು ಹೊಸದು ಮುದ್ರೆ ಎನುತ ಕೈಯ ಕುಣಿಸುವ

ನಂದ ಕಂದ ಧರೆಗೆ ಬಂದ ಚಂದದಿಂದ ನಂದನ
ಆನಂದದ ಹೊನಲು ತಂದ ಮನೆಯಿದೀಗ ನಂದನ